Медал учун миллион: Кураш бўйича жаҳон чемпионати ғолиблари тақдирландилар
Президент Садир Жапаров кураш бўйича жаҳон чемпионати ғолибларига иззат-ҳурмат кўрсатди.
Яқинда Сербияда ўтган кураш бўйича жаҳон чемпионати ғолибларини тақдирлаш маросимида Қирғизистон президенти Садир Жапаров, олтин медални қўлга киритган Айсулуу Тинибекова, Ақжўл Маҳмудов ва Жўламан Шаршенбековнинг ҳар бирига 1 миллион сўмдан мукофот пулини берди.
Кумуш медални қўлга киритган Айпери Медет қизига 750 минг сўм, бронза медалини ютиб олган Тайирбек Жумашбек уулуга эса 500 минг сўм топширди. Шунингдек, президент спортчиларнинг мураббийларига ҳам пул мукофотлари билан сийлади.
Эслатиб ўтамиз, Қирғизистон спортчилари Сербия пойтахти Белградда ўтказилган кураш бўйича жаҳон чемпионатида 30дан зиёд давлат орасида учинчи ўринни эгалладилар.
Ғолиблар “Манас” аэропортида ҳурмат билан кутиб олиниб, қатор мукофотлар билан тақдирланмоқда.
Давлат қароргоҳида спортчиларни қабул қилган Қирғизистон президенти Садир Жапаров, жаҳон чемпионатида синовлардан шараф билан ўтиб, кучли ирода ва энг яхши фазилатларни намоён этгани учун спортчиларга барча қирғизистонлик мухлислар номидан миннатдорлик билдирди.
Жапаров Қирғизистон дунёнинг 30дан ортиқ давлати ўртасида умумжамоа ҳисобида учинчи ўринни эгаллаганини мамнуният билан таъкидлаб, мамлакат тарихида биринчи марта бундай натижага эришилганини урғулади. Унга кўра, бу ютуқлар миллионлаб қирғизистонлик мухлислар қалбини ўз мамлакати ва спортчилари учун фахр-ифтихорга тўлдирди.
“2024-йилда Парижда бўлиб ўтадиган Ёзги Олимпия ўйинларига йўлланмани қўлга киритганларга катта умид ва ишонч билдирамиз. Шубҳасиз, юрт байроғини баланд ва ғурур билан кўтараётган спортчиларни эътибордан четда қолдирмаймиз ва ваъда қиламизки, эришган ютуқлари қадрланади”, деди президент.
Белградда бўлиб ўтган кураш бўйича жаҳон чемпионатида қирғизистонлик спортчилар Ақжўл Маҳмудов, Жўламан Шаршенбеков ва Жумашбек уулу Тайирбеклар қатнашиб, биринчи ўрин, олтин медални қўлга киритди.
Қирғиз аёллар курашида тумор бўлган спортчи Айсулуу Тинибекова ҳам ғалаба қозониб, учинчи марта жаҳон чепиони бўлди. Шунингдек, аёллар курашида жароҳат олганига қарамай, юрт шарафи учун охиригача курашган Айпери Медет қизи кумуш медални қўлга киритган.
“Муваффақиятларингиз ортида ўн, балки йигирма йиллик тинимсиз меҳнат ётади. Мен буни спорт билан шуғулланаётган инсон сифатида жуда яхши тушунаман. Ўзларининг меҳнати, матонати, темир иродаси, қолаверса, мураббийларининг маҳорати туфайли спортчилар ғалаба қозонади. «Йигитнинг меҳнатини ер ютмайди» деганларидек, меҳнатингиз зое бўлмайди. Сизлар нафақат Ватан шарафини улуғлаб, балки минглаб ёшларнинг қалбига олов ёқасиз”, деди Жапаров ўзининг табрик сўзида.
Тадбир сўнгида, президент Жапаров мамлакат терма жамоаси мураббийлар штабининг тинимсиз меҳнати, ватанпарварлиги, халқаро савиядаги спортчиларни тарбиялаши, уларда қўйилган пойдевор, эндиликда спортчилар юртимизга ғалаба келтираётгани учун миннатдорлик билдирди. Бундан ташқари, Садир Жапаров спортчиларнинг ота-оналарига миннатдорчилик билдириб, уларнинг чемпионлар тарбиясига қўшган ҳиссасини алоҳида қайд этди. У шунингдек, шу кунларда Хитойда бўлиб ўтаётган ХIХ Осиё ўйинларида иштирок этаётган қирғизистонлик спортчиларга ҳам муваффақиятлар тилади.
Жорий йилнинг август ойида Туркияда ўтказилган V Ислом ўйинларида ҳам қирғизистонлик спортчилар юқори натижаларга эришган. Умуман қирғиз курашчилари жаҳон миқёсида кучли обрў-эътиборга эга.
Масалан, 2021-йилнинг август ойида Япония пойтахти Токиода бўлиб ўтган Олимпия ўйинларида ҳам юқорида номи тилга олинган қирғизистонлик спортчилар иккита кумуш ва бир бронза медалини қўлга киритишган. Улар Бишкекка келганидан кейин, президент давлат мукофотлари, автомашина ва пул мукофотлари билан тақдирлаган.
Кумуш медални қўлга киритган Айсулуу Тинибекова ва Ақжол Маҳмудовга иккинчи даражали “Манас” ордени, 10 миллион қирғиз сўми ва Тойота РАВ 4 автомобиллари топширилган. Бронза медалини қўлга киритган Мээрим Жуманазарова эса учинчи даражали “Манас” ордени, 7 миллион сўм ва Тойота РАВ 4 автомобили билан тақдирланган эди.
Бундан ташқари Қирғизистон Миллий Олимпия қўмитаси ушбу спортчиларга стипендиялар сертификатларини топширган. Қўмита президенти Садир Мамитовнинг сўзларига кўра, стипендия соҳиблари сони 10 тадан 15 тага кўпайган. Улар 2024-йилда Парижда бўлиб ўтадиган Олимпиада ўйинлари бошлангунга қадар 500 АҚШ доллари миқдоридаги стипендия олиб турадилар.
Улар қуйидагилар:
Ақжўл Маҳмудов (юнон-рум кураши),
Жўламан Шаршенбеков (юнон-рум кураши),
Алибек Осмонов (эркин кураш),
Бекбўлўт Мирзаназар уулу (эркин кураш),
Эрназар Ақматалиев (эркин кураш),
Айсулуу Тинибекова (аёллар кураши),
Мээрим Жуманазарова (аёллар кураши),
Айпери Медет қизи (аёллар кураши),
Қалмира Билимбекова (аёллар кураши),
Владимир Золоев (дзюдо),
Нурсултон Кенешбеков (енгил атлетика),
Гулшанай Сатарова (енгил атлетика),
Денис Петрашов (сузиш),
Бекдўўлўт Расулбеков (оғир атлетика),
Нурадин Рустамбек уулу (бокс).
Келаси йил Парижда бўлиб ўтадиган Олимпия ўйинларига ҳозирча беш нафар қирғизистонлик спортчи йўлланма олди.
Оқбура, Бишкек.
Расм интернетдан олинди
